Curs
Ils curs han lieu mo la damaun, cun differentas uras da cumenzament. Il lieu d'inscunter è 15 minutas avant il cumenzament dal curs en la tenda dal festival en il vitg da teater; da là accumpagnain nus tai al local dal curs.
Annunziar e deannunziar pos ti fin a las 17 il di avant en la PEP App. Sch'in curs ha lieu u betg, vesas ti adina qua sin la website: sche memia paucas persunas s'annunzian, croda il curs.
In curs custa CHF 20.–. Per las gruppas da teater participantas èn ils curs gratuits.
Gieu nunverbal
Alexandre Zurkinden
Gia avant ch'i vegn discurrì, raquintan ils corps istorgias. Ina posiziun, in flad u in sguard midan co ch'ina scena vegn percepida. En il teater nunverbal lavurain nus cun il linguatg dal corp, cun preschientscha e cun moviment. Nus suondain impuls, reagin in sin l'auter e scuvrin quant bler che po naschair senza pleds. Latiers dastga vegnir empruvà, exagerà e magari er mal chapì. Ensemen dain nus furma a quai che n'è betg vegnì ditg e fain la silenzia visibla. Tge di tes corp, avant che ti pensas insatge?
Situaziuns delicatas – da scenas d'amur fin al cumbat sin il palc
Katrin Janser Fors
Quest curs porscha la pussaivladad d'approfundar sias abilitads d'actur e da sa confruntar cun situaziuns difficilas sco actur u er sco reschissur. Cura è l'emoziun, il gieu, la scena autentica, cura è quai memia bler? Co ans avischinain nus a scenas chargiadas d'emoziuns e tge modas dat i da las realisar sin il palc? En quest curs emprendain nus tips e tricks co ch'ins po represchentar autenticamain u realisar abstractamain sin il palc sfidas captivantas sco scenas d'amur u da violenza. Nus emprendain pitschens tricks da cumbat sin palc ed exploreschain ed empruvain differentas vias a basa da texts.
Lavuratori da scriver – per tuts che vulan scriver istorgias
Peter Locher
Da las emprimas ideas al concept dramaturgic: entschatta – culminaziun – fin. (nagina lavur da dialogs)
Workshop cumica
Cyrille Richard Marty
In workshop da giugada davart la cumica – co nascha in rir sin il palc? E tge datti da basegn per ch'ina situaziun cumica na paria betg penibla, mabain daventia in mument plaschaivel plain cumica?
En quest workshop ans tuffain nus en il mund da la cumica – corporalmain, directamain e cun grond plaschair d'empruvar. Da acziuns simplas, d'influenzas sin nossas situaziuns da gieu, da reacziuns sin il spazi, sin objects e sin ils partenaris da gieu naschan scenas che paran lievas, precisas e surprendentas. Ensemen agrischain nus il senn da gieu per timing, reducziun ed accents cumics. Nus creain figuras, exploreschain clischés, sviluppain da quai caracters efficazis e scuvrin co e pertge che la cumica funcziunescha en il teater.
I na va betg per pointas perfetgas, mabain per preschientscha, instinct, ledezza da giugar e la disponibladad da faglir cun convicziun d'ina buorda en l'autra.
Per tge va i?
- Co nascha la cumica da nossa acziun fisica?
- Co creain nus cun figuras cumicas e lur clischés caracters efficazis?
- Co daventan malchaneschas, interrupziuns e sentiments «negativs» conflicts giugaivels cun lievezza?
- Co construin nus cun ledezza da giugar, precisiun e simpatia ina colliaziun directa cun il public?
Il workshop è vischin a la pratica e viva dal empruvar ensemen. Tut tenor il grup vegnan integrads finamiras persunalas, impuls spontans ed il concept «Theaterbar» da commedia-magica.
Tgi po far cun? Tuttas las persunas cun plaschair da giugar, da faglir, dad empruvar e da scuvrir moments cumics sin il palc. Experientscha da teater è eventualmain d'agid, ma betg absolutamain necessaria.
Accents en il text – per la giugada e la reschia
Alex Truffer
Il public duai vegnir incantà mo cun la furmaziun dal text. Tge datti da basegn per quai? L'element il pli impurtant è: la posiziun dals accents. Cun accents precis manain nus il public tras noss text, uschia ch'ils patratgs ed ils maletgs èn là nua che nus lain. In curs betg mo per la giugada e la reschia!
Play, Play, Play – bainvegni en la tenda!
Alexandre Zurkinden, Cyrille Richard Marty & Katrin Janser Fors
Memia stanchel per in workshop u per ina represchentaziun? Alura ve tar nus en la tenda da teater. Là spetgan sin tai pitschnas producziuns, gieus ed exercizis, tar ils quals ti pos far cun (sche ti vuls), e forsa ina u l'autra chanzun da teater. Per in Cüpli u ina cola en buna cumpagnia e cun buna luna n'è i mai memia baud.
Teater d'improvisaziun – l'entrada facilitada!
Susanna Hug
Cun in training da basa giugaivel ta introducesch jau pass per pass en il mund da l'improvisaziun da teater. Cun bler plaschair da giugar e cun l'emprender da reglas e da tecnicas gudognas ti confidenza e vegns prest a pudair reagir spontanamain sin ils impuls da tes partenaris da gieu. Suenter n'ès ti betg pli da franar. Attenziun: privel da dependenza! Dal tuttafatg sper via ta exercitescheschas ti en l'art dal faglir e ta das uschia l'impuls ultim en la fin d'emna … ed en la vita pura!
Coloraziuns dal text - incantar il public - per la giugada e la reschia
Alex Truffer
Il public duai vegnir incantà mo cun ina furmaziun dal text ben patratgada. Tge datti da basegn per quai? Ultra d'ina posiziun precisa dals accents (curs da venderdi) èn impurtants ulteriurs elements sco: melodia e ritmica. In curs betg mo per la giugada e la reschia!
Scriver texts improvisads
Alexandre Zurkinden
Ina frasa nascha darar suletta. In pled tira l'auter cun sai, in patratg stumbla en l'auter, e nunspetgadamain è là insatge che nagin aveva planisà ordavant. En il scriver improvisà da texts na scrivain nus betg vers l'idea perfetga — nus scrivain per la chattar sin via. Svelt, spontan, curius u poetic. Ina giada sulet, ina giada ensemen. Senza stizzar, senza tegnair enfermamain, senza reflectar memia ditg. Savens datti mo ina singula frasa tranter la nunsenn e la vardad. Ensemen rimnain nus tocs da lingua, suondain maletgs e dain ina vusch al chaos. Tge capita, sche ins dastga emblidar in mument il crajun cotschen intern?
Esser veramain preschent – gieu veritabel
Katrin Janser Fors
Ina da las emprimas chaussas che l'uman fa, cur ch'el è naschì? Giugar! Saja mo per il plaschair e per il divertiment u cun l'intent da cuntanscher insatge. En quest curs agrischain nus nossa percepziun, lavurain vi da nossa preschientscha corporala e vi da nossa forza d'expressiun. Nus passain dal gieu a la giugada veritabla. Nus empruvain differentas metodas da lavur da creaturs da teater, per chattar ils caracters e las emoziuns che dorman en nus.
«Culture over the Rööschtigrabe»
Cyrille Richard Marty
In workshop da giugada sur cunfins linguistics – en tudestg – Français – English – cun mauns & peis!
Quant differentamain chapin nus atgnamain nossa cultura? E quant sumeglianta è nossa maniera, cur che nus stain ensemen sin il palc? En quest workshop spezial sa scuntran persunas entusiasmadas dal teater da lingua franzosa, tudestga ed autra sin egliada ad egliada – en in'atmosfera creativa, averta e plain humor.
La lingua dal curs n'è betg fixada, mabain sa mova libramain tranter franzos, tudestg, englais – ed il gieu nunverbal. Ensemen exploreschain nus co che marcaziuns culturalas sa mussan en nossa maniera da giugar. Latiers lavurain nus cun elements dal teater d'improvisaziun, explorain l'artisanadi dal gieu autentic e chattain puspè las reglas en noss gieu. Dal tuttafatg senza pressiun, ma cun bler interess ed impuls da giugar.
Per tge va i?
- Dat i differenzas culturalas tar il giugar teater?
- Tge ans collia sin il palc – malgrà (u gist pervia da) nossas differenzas?
- Co po naschair ina cultura da teater cuminaivla, sche la politica vul unir las associaziuns da teater sur las linguas ora?
Il workshop viva dad exercizis spontans, da dumondas cuminaivlas e da la collavuraziun creativa – sur barrieras linguisticas e (pre)giudizis ora, viers novas furmas d'expressiun ed ina chapientscha giugaivla.
Tgi po far cun? Tuttas las persunas cun plaschair da giugar, dad empruvar e da sa scuntrar – saja en tudestg, franzos, englais u cun il linguatg dal corp. Experientscha da teater è eventualmain d'agid, ma betg absolutamain necessaria.